Burime për mediat bëjnë me dije se ajo ka rrëfyer me detaje skemën e korrupsionit dhe pastrimit të parave duke depozituar pranë organit të akuzës një sërë provat të reja të cilat rëndojnë pozitat e çiftit Veliaj-Xoxa.
Adela Kondakçiu ka punuar për një periudhë të gjatë kohore si financiere e Ajola Xoxës. Marrëdhënia e saj me këtë të fundit u ndërpre pasi me një “urdhër rrufe” u pushua nga puna pas pakënaqësive që kishte treguar sa i përket pagave.
Ajo u mor në pyetje nga prokurorët për herë të parë më 10 dhjetor të vitit të kaluar, vetëm disa ditë pasi agjentët e BKH-së së bashku me përfaqësues të SPAK “zbarkuan” në banesën e çiftit Veliaj-Xoxa, ku dhe bënë të mundur sekuestrimin e disa dokumentave si dhe telefonit të bashkëshortes së kryebashkiakut.
Kondakciu ka pretenduar se si zonja Xoxa po ashtu dhe avokatët e saj i kanë bërë presion.
Kujtojmë se një ditë më parë Prokuroria e Posaçme mori të pandehur 30 persona në kuadër të hetimeve ndaj kryetarit të Bashkisë së Tiranës, Erion Veliajt.
Këtij të fundit akuzat iu komunikuan në qeli nga oficerët e BKH-së, ndërkohë që e pandehur u mor edhe bashkëshortja e tij, Ajola Xoxa.
Veliaj akuzohet për korrupsion aktiv, pastrim parash, fshehje pasurie dhe futje e sendeve të paligjshme në burg. Për këtë të fundit, është marrë i pandehur edhe efektivi i policisë Fatjon Baci, i cili akuzohet se i dha telefonin Veliajt për të folur me bashkëshorten teksa transportohej nga Durrësi drejt Apelit të Poasçëm për tu njohur me masën e sigurisë. Jo vetëm kaq.
Akuzat për korrupsion pasiv, pastrim parash dhe fshehje pasurie iu komunikuan edhe bashkëshortes së tij e cila u paraqit në SPAK e shoqëruar nga avokati. I pandehur, u mor edhe daja i Ajola Xoxës.
E pandehur është marrë edhe deputetja e PS, Klotilda Bushka e cila akuzohet për veprën penale të kryerjes së veprimeve që pengojnë zbulimin e të vërtetës.
Mes të pandehurve janë edhe biznesmenë si Mirton Lika, pronar i Sky Hotels, i cili akuzohet për fshehje të të ardhurave. Për pastrim parash është marrë biznesmeni Elman Abule.
Të pandehur janë marrë gjithashtu Ina Goxhaj, Flutura Xhani, Valmir Xoxa, Fatmir Bektashi, Meriman Palushi, Sokol Kryeziu dhe Frosina Bollo.
